Hikayat Rosdiana Binti Abdul Manaf

Amma ba’du mulai kisah

Haba tapeugah keu sidroe Dara

Nyak Rosdiana asli nan sah

1988 pah lahe u donya

            Nama di Ayah Abdul Manaf

            Bunda mutuah Sakdiah nama

            Na limoeng syedara bungong siulah

            Saboh Ma saboh Yah dalam keluarga

Teuma yang keu phone geu’hei le Ayah

Aneuk mutuah Fuadi nama

Aduen Yusrizal permata Ayah

Aneuk yang meugah lahe keudua

            Teuma yang keu lhe kumbee si ulah

            Aneuk yang ceudah Elida Fitri nama

            Nyak Rosdiana yang tanyoe kisah

            Lumboi 4 jeulah lahe bak poma

Teuma keu limoeng meukeunoeng leumpah

Nama tapeugah Muhammad Rizki Ananda

Nyan keuh syedara saboh Ma saboh Yah

Aneuk Tgk Abdul Manaf dalam keluarga

            Hudep lam saba hana meubantah

Gasehan Ayah kadeungoen Poma

Nyan keluarga sakinah warahmah

Geubi le Allah keunoe u donya

Alhamdulillah laju tasuson

Deungoe e kawom saboh riwayat

Nyak Rosdiana lahe lam duson

Ranup kuneng o’en leupie ngon mangat

            Ie krueng Meureudu leupie ban i boen

            Neucok hai Ampoen beujeut keu ubat

            Riwayat nyak Rosdiana mulai bak phon

            Bungong si tahon kuntoem bei mangat

Nyak dara lahe bak saboh Duson

Mulieng Beuracan gampong haba tasurat

Tanggal 3 buleun 11 lahe lam Duson

1988 thon dalam alamat

            Yoh masa ubiet that sopan santon

            Hana ron karon pribadi get that

            Beut ngen sikula yakin ngon teukon

            Bak aneuk gampong cukop meu adat

           

Hingga ka rayeuk bungong si tahon

Bak umu 6 thon sikula jak intat

SDN Mulieng keunan geu arong

Sinan na 6 thon sampe ka tamat

            MTsN Meureudu laju geu arong

            Yakin ngoen teukon hate seumangat

            Tamat disinan hanya 3 thon

            Ho laen sambong laju ka meuhat

Bak MAN 2 Sigli hili le langsong

Belajar teukon lam jeuit-jeuit saat

Karna cita-cita lam jantong

Oh troeh bak ujong ijazah geumat

            Tamat di sinan hate terharom

Poma di gampong seunang leupah that

            Ayah ngon Poma kubah di gampong

            Laju geu arong Fakultas meuhat

Lhokseumawe toe ngon Lhoksukon

Pasee ngon Geudong tingoh maju that

STAIN Malkussaleh meusaheh hukom

Keunan geu arong jurusan get that

            Sinan kuliah meugah na 4 thon

            Toe PT. Aron yang cukop hebat

            Hingga oeh dudoe po bungong sukon

            Wisuda langsong ijazah geumat

Kajeut keu sarjana Dara lam duson

Geuwoe le langsong keunoe u tempat

Poma ngon Ayah payah tajunjong

Boh hate jantong inoe seunang that

            Gunong Seulawah meugah hai rakan

Lam Krueng Beuracan ureng rah ija

Buhu tabalek inoe mate an

Mangat ta karang kerja bak MAA

Pak Gade Salam meuhat rancangan

Sekretariat geu rancang beuna MAA

Peugot mutasi Instansi Pemerintahan

Ato jurusan Kabinet Pidie Jaya

            Lahee MAA nibak masa nyan

            Qanun ngon Reusam ngat mupat punca

            Geu mita ureung yang jroeh pikiran

            Pak Armia rijang geu lantik keu kepala

Minyoe pak Kasem laen jurusan

Bagian kelembagaan kerja sama

Keu Bendahara kana cit sinan

Dara idaman Ibuk Nurdiana

            Kanto MAA sinoe ka jalan

Kana peluang yang hana kerja

            Nyak Rosdiana lamar le rijang

            Bak pak Gade Salam ijazah geujak ba

Geulake honor bek pengangguran

Geupeuduek rijang nibak MAA

Peu yang na perintah bagah kerjakan

Geu yue le atasan harus laksana

            Operator computer inan jurusan

            Perintah atasan Bapak Armia

            Meunan keuh sabe wahe e rakan

            Keurija dara nyan di sinoe kana

Tapiyoh siat meuhat haba nyan

Jinoe takarang tentang asmara

Datangnya cinta wahe e rakan

Dari phoen Adam keu Siti Hawa

            Bungong Malori di dalam taman